လက်နက်တပ်ဆင်ပေးအပ်ပွဲဟု ခေါင်းစဉ်တပ်ကာ စုဝေးရောက်လာသည့် ပါတီဝင်များကို ပြည်ထောင်စုကြံ့ခိုင်ရေးနှင့်ဖွံ့ဖြိုးရေးပါတီ၏ ထိပ်သီးခေါင်းဆောင်များက ဝါးရင်းတုတ်နှင့် ဝါးချွန်များ ထုတ်ပေးနေသည်ဟု ယခုရုပ်သံတွင် တွေ့နိုင်သည်။ ထိုလုပ်ရပ်နှင့်ပတ်သက်၍ ကြံ့ခိုင်ရေးပါတီ ဥက္ကဋ္ဌဖြစ်သူ ဦးခင်ရီက အကြီးအကျယ် စိတ်ဆိုးနေသည်ဟု သိရှိရသည်။ ဝါးချွန်များထုတ်ပေးနေသည့် ၃၅ကျော်ကြာ ရုပ်သံဖိုင်ကိုလည်း စစ်တပ်ဝါဒဖြန့် လူမှုကွန်ယက်များတွင် ထုတ်လွှင့်ပြီး မကြာခင် အသီးသီး ပြန်ဖြုတ်သွားကြသည်။ ဖေဖော်ဝါရီလ ၂၁ရက်နေ့က နေပြည်တော်၊ ဒက္ခိဏသီရိမြို့နယ်ပါတီရုံးတွင် ပြုလုပ်သော ထိုအခမ်းအနားသို့ ကြံ့ခိုင်ရေးပါတီ ဗဟိုအလုပ်အမှုဆောင်အဖွဲ့ဝင်များ ဖြစ်ကြသော ဒုတိယဗိုလ်ချုပ်ကြီးဟောင်း ဦးမြင့်လှိုင်၊ ဗိုလ်ချုပ်ဟောင်း ဦးစိုးနိုင်နှင့် နေပြည်တော် ၈မြို့နယ်၏ ကြံ့ခိုင်ရေးပါတီဥက္ကဋ္ဌ ဦးလှဆွေ တက်ရောက်ခဲ့သည်။ ခုခံတော်လှန်သူများကို တန်ပြန်တိုက်ခိုက်ရန် အရပ်သားများကို ‘ပြည်သူ့စစ်’ အမည်ခံဖွဲ့စည်းကာ လက်နက်တပ်ဆင်ပေးသည့် စစ်ဗိုလ်ချုပ်များ၏ ဗျူဟာသည် ယခင်ကတည်းက ရှိနှင့်ပြီးဖြစ်သည်။ စစ်တပ်ထောက်ခံသူများကို တရားဝင် လက်နက်ပေးမည့်မူဝါဒကိုလည်း စစ်ကောင်စီက မကြာသေးခင်ကမှ ထုတ်ပြန်ထားသည်။ သတင်း၊ တင်ဆက် - စထွန်းအောင် (လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် https://www.userroll.com/site/register/m1f6pen နှိပ်၍ လှူဒါန်းနိုင်ပါသည်)
